العــقل البــاطن

جـيتني مثل الجنون و يوم فارقتك عقلت
هاك شفني بعت عقلي
جيت بجنون اتبعـــك .. اتبعــك .. و اسمعك

السلام عليكم ورحمة الله وبركاته

قبل ربع ساعه قبال قاعة الإمتحان
محمد : وش وش تعريف النظام ؟
علي : محمد قلت لك إياه مرتين
النظام هو : مجموعة القواعد العامه ,,
محمد : مجموعة القواعد ,,,, الإيش؟
علي : يووه وش قصتك أنت ؟
محمد : ياخي قلت لك صعب صعب مستحيل ينحفظ
علي : لا موب صعب انت متخيله صعب ويمكن ما يجي

بعد الإمتحان:
علي : جانا النظام , , هاه بشر تذكرته ؟
محمد : لا حاولت بس احسه طار من مخي قلت لك صعب ما ينحفظ ..
[rainbow]\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\\[/rainbow]
كيف حالكم جميعاً ؟
وكيف حوسة الاختبارات والقلق الله يعينا يارب ويسهل لنا , ,

كثير مننا يصيرله مثل موقف محمد نحط ببالنا إن هـالشي صعب وخلاص بعدها ما نقدر نستوعبه.

تدرون ليه ؟؟؟

لان هـالفكره اوحيناها لعقلنا الباطن وسجل عنده ان هـالشي صعب

فتلقائياً اول ما يقابلنا تُرسل لنا الرساله الي سجلناها
" صعب ما ينحفظ " وفعلاً ماراح نقدر نحفظه مهما حاولنا

حاب اتكلم معاكم عن شي فينا بس مغمور مسكين محد يهتم فيه الي هو

" العقل الباطني " ( اللاوعي )

للأسف كثير مننا مهمله وما يدري انه مركز طاقه ضخم جداً
تخيلو معاي ان كل واحد مننا جواته كنز له لوحده قادر يآخذ منه بالكميات الي يبيها وبأي وقت بدون لاينقص !

شي خيالي بس هو واقع خلونا نعرفه سوا





نعرف ان العقل الباطني مو شي محسوس يعني لا هو المخ ولا العقل الواعي
العقل الباطني هو مركز العواطف \ الإنفعالات \ ومخزن الذاكره \ مركز الإبداع

تخيلوا ان عندكم قطعه أرض كبيره وتبون تزرعونها شي طبيعي انه لو اخترنا برتقال بيطلع برتقال موب طالع لنـا تفاح !

عقلنا الباطني زي هالقطعه بالضبط , الي تبيه يطلع لك ازرعه فيها

معنى كذا انه عندنا عقلين ؟!!

اي نعم

واحد موجود الي هو " العقل الواعي " وهذا مسؤول عن القرارات اليوميه والي تعودنا عليها والبطل ( نفسي أو حسي ) " العقل الباطني " مسؤول عن مواجهة المواقف المفاجئه .

لو عرفنا نوازن بينهم راح يشتغلون سوا بإنسجام وهدوء وراح نتفاجئ بالنتايج
العقل الباطني : راح تكون مهمته ارسال الإيحاءات الي تخزنت فيه لـلعقل الواعي


مثلاً :

" بأحل كويس "

العقل الواعي : ينفذ وراح يكون حلنا كويس فعلاً ( بإذن الله )

كيف نستخدمه ونخليه في صالحنا ؟؟

بالإيحـــــــاء

والإيحـاء :
هو عملية عقليه نتقبل من خلالها الفكره الي اوحيناها لأنفسنا.
والإيحاءات الي نرسلها لعقلنا الباطني هي الي تتحكم بمسار يومنا
مثال : كيف راح نقدم البرزنتيشن تبعنا , بكيف راح نجتاز المقابلة الشخصيه







خالد موظف في البنكـ راتبهـ 7 الآف
زوجتهـ حصه كل يوم تزن على راسه تبي ساعه من الدهام مثل أحلى من ساعة بنت عمها
على العشاء جالسين عند التي في هي وخالد
تبدأ تبدأ موال كل يوم
حصه : خالد حبيبي تذكر الموضوع الي كلمتك فيه امس
خالد ( مسوي مركز مع التي في كودها تهون ) : اي موضوع
حصه : الساعه يووووووه نسييت
خالد : هـاه اي ساعه
حصه : اي استدلخ لي يعني اني ماني فاهم أصلاً انت كذا تدور الي يغثني لو شايف نوفوه وهي تقلب يدها يمين وشمال تبينا نشوف الساعه ما سويت فيني كذا
خالد : اسوي فيك ايش ؟ انت ما تقدرين ظروفي راتبي 7 الآف وتبين ساعهـ بـ 10 يعني بتصفرين الراتب وتبين فوقه ثلاثة الآف كمان ارحميني!!
حصه : أرحمك من ايش انت الي ارحمني من عيشة الفقر الي معيشني اياهـا العالم سفرات ومجوهرات وفساتين كل واحد اغلى من الثاني وانا يا حظي بس
خالد : ياحظك اجل احمدي ربك غيرك يحسدك على العيشة الي انتي فيهـا
حصه: يحسدني على وشو ياحظي على الخدم والحشم الي ماليين بيتي خلنا ساكتين بس
خالد : أوف منك حرمه نكد×نكد
طععععع<< صوت الباب يطلع من البيت معصب وموصل حده
يدق على صديقه عمر ويتقابلون يحكي له السالفه كلها
عمر : طيب ليش ما تحاول تضبط اعصابك
خالد : اضبط أعصابي!!!
تستهبل انت عقب الي قلته لك تقول لي اضبط اعصابي تحمد ربها ما كفختها
عمر : اوف اوف كل هذا عشان ساعه يا سيدي وربي ما تسوى
خالد : وربي عارف انها ما تسوى وانا مليت كل يوم نتخانق على هـالساعه الله لايعيدها
عمر : طيب راح اقول لك على طريقه بتريحك
حكى عمر لخالد عن الايحاء وعطاه جمل يرددها قبل لا يرد على زوجته

من بكرا
حصه تجلس جنب خالد تبي تبدأ الهجوم على هـالمسيكين
خالد يكلم عقله : " الحين بتحاكيني عن الساعه , , بخليها تكمل كلامها وبجاريها , , بنهي الموضوع على خير ,, وهـ الليله ما راح نتخانق بإذن الله "
حصه : خلود عمري فكرت أمس بالي قلت لك عليه يعني يرضيك زوجة خالد ما تتكشخ بساعة جديده شف شف بالله موب هـاليد الحلوه تستاهل ساعه حلوه
خالد ( خلاها تكمل كلامها ولف بهدوء عليهـا ) : فعلاً وتستاهل أكثر كمان يـا قلبي خلاص وعد ان ربي سهلها اجيب لك احلى من ساعة نوف بمليون مرره
حصه : صدق ربي يخليك لي ولا يحرمني منك

كان ممكن خالد يتنرفز ويرد زي كل مره وتنقلب نكد لكن هالمره اوحى لنفسه قبل لا يبدأ حكي انه ماراح ينفعل ويبي هـالليله تعدي على خير
وفعلاً تم الي يبيه .


قواعد مهمه :

- العقل الباطني مثل الإسفنجه اي شي بنحط فيه بيمتصه ,
لذلكـ لما نبدأ بالإيحاء وارسال الرسايل له لازم نركز على اننا ما نحط كلمات الاحتمال بجملنا لانه يعكسها " لا " .

- رسايلنا للعقل الباطني لازم تكون عباراتهـا " حازمه \ جديه \ واثقه "

- لازم نذكر كل التفاصيل " بدخل مكتبي بهدوء , , بصبح على الموجودين , , بصلح قهوتي وبشربهـا بروقان , , وابدأ يومي الحلو بإذن الله "
يعني نحرص اننا نذكر كل الخطوات الي بنسويهـا عشان العقل تلقائياً اول ما نبدأ بأول خطوه " بدخل مكتبي بهدوء " ينفذ كل السلسه الي بعدها بنفس الترتيب وبنفس ردود الفعل الي خزناها بعقلنا

- العقل الباطني كمخه
كمخه = طيب جداً وينلعب عليه
لذلك استغلوه أيما استغلال

- ( مستحيل \ صعب \ طويل ) كلمات لازم تنسمح من قواميسنا
لان بالفعل ما فيه شي مستحيل
( ايمان بالله \ ثقه بالنفس \ ثقه بالقدرات \ عزم \ اصرار )
وبنلقى هـالمستحيل حقيقه قدامنا وبنقدر عليه بعون الله


تحياتي لكم وأعتذر عن الإطالة ,,

هو انت فيك بطن عشان يكون عندك عقل باطن بعد ...

يعطيك العافيه والصحه على الطرح .. بس انا عقل الباطن يقولي دايم انى جايع وابي اكل ..

تحياتي لك حزن ,.,

لك خالص شكري وتقديري يا حزن النبلاء على الموضوع الرائع

المشاركة الأصلية كتبت بواسطة ولـد النــعـمـة

هو انت فيك بطن عشان يكون عندك عقل باطن بعد ...

يعطيك العافيه والصحه على الطرح .. بس انا عقل الباطن يقولي دايم انى جايع وابي اكل ..

تحياتي لك حزن ,.,

حااااااسدني عشااااان ما عندك مثل بطني
مشكوووور على مرورك ترا ينفع لك الموضوع سو عملية ايحاااء وقل انا مب سمين مره واقدر انحف وتنحف

[align=center]

العقل الباطني كمخه
كمخه = طيب جداً وينلعب عليه
لذلك استغلوه أيما استغلال

- ( مستحيل \ صعب \ طويل ) كلمات لازم تنسمح من قواميسنا
لان بالفعل ما فيه شي مستحيل
( ايمان بالله \ ثقه بالنفس \ ثقه بالقدرات \ عزم \ اصرار )
وبنلقى هـالمستحيل حقيقه قدامنا وبنقدر عليه بعون الله [/align]

[align=center]موضووع خيالي وبجد روعة
ومن الاساليب الابداعية في حفظ القرآن
استغلال العقل الباطن وارسال رسائل ايجابية
وكثير مانجحت

يعطيك العافية اسلوب حلو
احترامي[/align]

موضوعك جداً ممتاز اخي حزن

نحن نغذي العقل الباطن بسلبيانتا دون ان ندري

وعند المواجهه يخرج لنا ما خزناه فيه وماغذيناه

شكرا لك

النجم طلياان , عزتي بديني , أعظم حويطيه

حياااااااكم الله نورتوا الموضوع بتواجدكم

شـكــ وبارك الله فيك ـــرا لك ... لك مني أجمل تحية .
على موضوعك الرائع