تنظر إلي
تنتظر إني أعطيها الطعام
مديت لها يدي .. أعطيها حب .. انثره لها هنا وهناك ...حتى تعودت علي .. و قررت ان تقترب أكثر
*
*
*
اريد ان اكلمها ... اريد ان اسألها .. وبعد ذلك تبسمت على الخيالات إللي عايشة فيها
فقلت آه من التعب بصوت عالي .. إلا وردت علي
قالت:سلامتك يا اميرة من الآه
قلت:سبحان الله ... حمامه تتكلم ... وكمان تعرفيني
قالت إيه .. كم مرة أكلتيني ... ونثرتي لي الحبوب بيديك
سألتها ... وكيف تذكريني من بين ملايين البشر ؟
قالت :إحنا يا اميرة ماهو مثل بعضكم .. إحنا ما ننسى الجميل .. ولا ننكر المعروف .. ونحفظ ديننا أحسن منكم
قلت : انتي احسن مننا ؟؟؟
قالت : طبعا .. نسبح الله بكرة وأصيلا .. ويكفي يوم كان نبيك صلى الله عليه وسلم في الغار .. حميناه .. وجلسنا على الغار .. ووضعنا البيض وفديناه .. لكن انتم ... ايش سويتم ؟؟؟
بضائع الدنمارك تملأ بيوتكم والله المستعان
وربك ... لو جتنا حبوب من الدنمارك لنتركها .. حتى لو متنا من الجوع
رحت سألتها لاجل أتجنب الإحراج .. ياحمامه كيف حالك ؟
قالت: بخير يا اميرة
قلت: كيف الدنيا معاك .. مبسوطه .. والا متضايقه .. مرتاحه .. والا تعبانه ؟؟؟
قالت : عجيب أمرك اميرة.. وهل هناك أحد من خلق الله ماهو قانع بما قسم الله له و ماهو مبسوط ؟؟؟
قلت: كثير والله يا حمامه
قالت: الحمدلله الذي عافانا مما ابتلاكم
قلت: الدنيا كلها تعب .. جري وراء الرزق وجري وراء العمل والمظاهر ... وكأننا بنعيش على طول
قالت: باعلمك شيء يا اميرة .. ولا تقولين [فلسفة من حمامه )
قلت: هاتي ما عندك يا حمامه .. ولو كانت فلسفة مو مشكله .. الكل صار يتفلسف اليوم .. كل واحد والا وحده أصبح خبير .. كل واحد اصبح مفتي وعالم وإداري كبير .. وهو مفتاح اصلاح كل الأمور .. ماجات عليك
سمعيني .. علميني .. يمكن منك استفيد
قالت: شفتي هذي الساحه .. ملياااااانه حبوب .. ما آخذ إلا كفايتي .. بس إللي يشبعني .. ماني مثلكم
ولا فينا وحده مثلكم
كلنا جماعه وحده .. نأكل سوا .. نطير سوا .. ما تفرقنا مثل بعض المسلمين
نجمع ... نحسد ... نحقد
طيب أجمع لمين .. لنفسي ... طيب طالما انا شبعت .. أيش رايحه استفيد .. ليه ما اترك الباقي لحمام الحرم ... ليه بعض المسلمين .. ما يتركوا شئ للمسلمين
بالله عليك .. السنا خيرا من بعضكم ؟؟؟
قلت: اجمعي لعيالك
قالت: عيالي أعلمهم الطيران .. أعلمهم كيف يأكلوا .. لكن ... ما اجمع لهم أكثر من كفايتهم .. ما أشيل الحبوب المنثوره لكل الحمام
أنا أخاف من ربي .. ماني مثل بعض البشر .. أخاف أتحاسب عن باقي الحمام
قلت: طيب .. يا حمامه .. اجمعي لهم و لو ... من باب إنهم يرتاحون من بعدك
قالت: سبحان الله في طبع البشر .. مافي احد ما يتعب يا اميرة
( لقد خلقنا الإنسان في كبد )
.. كيف تبغين لهم الراحة .. كيف تطلبين لنفسك الراحه قبل ما تحطين رجلك في الجنة ؟؟؟
قلت: نفسي اسألك سؤال لكني مستحية
قالت: تفضلي
قلت: ارجوك ... لا تعتبرينه سخريه او معايبة على خلق الله
قالت: ما اعتقد إنك انتي إلي تعايبين على خلق الله يا اميرة ولا تسخرين من أحد .. وانتي عارفة إن أكرمكم عند الله أتقاكم
قلت: ما تمنيتي يوم إنك تغيري هذا اللون الرمادي .. ما تمنيتي إن يكون لك الوان زاهية .. تفتخرين بيها على باقي الحمام .. ما جريتي يوم خلف المظاهر ؟؟؟
قالت: والله عيب عليك تسأليني هذا السؤال .. تقدرين تغيرين ملابسك
قلت: كيف يعني
قالت: يعني لو جا احد المسلمين للعمره..وكان لابس ثوب ... والا حتى بنطلون
قلت: ما ينفع .. ولو كان حتى لابس بدله أرماني ... لازم إحرام
قالت: .. أنا كذا مثلهم .. ريشي ولوني دليل هويتي .. فخري وإعتزازي .. والمسلم إحرامه دليل هويته هنا .. أول ما اشوفه أعرف إنه مسلم .. إنه جاء يبغى رب البيت
أول ما أشوف المسلمة وحجابها وعبايتها .. اعرف إنها ملتزمة وتخاف ربها وتحفظ عرض أبوها
انا ريشي ومكاني هم هويتي .. لكن انتي كل حياتك ... هي هويتك
أنا يوم القيامة ابعث بريشي وأكلي إللي اكلته في الساحه وخايفه من الحساب .. وانت بكل حياتك وما فيها ايضا
قلت: لا تفهميني غلط ياحمامه .. انا قصدي من باب التغيير والزينة
قالت: صدقيني أنا أجمل مما تتخيلين .. تبغيني اتشبه بحمام ... غير حمام الحرم !!!
افرضي إني سويت مثل بعض البشر
لبست ثوب غيري .. تكلمت بكلام غيري .. خلعت ثوبي وثوب اهلي
افرضي إني جيت بكره بريش وردي
صدقيني مهما كنت حلوه .. ما بكون مثل باقي الحمام
بكون غريبة ولو كنت بين ربعي واهلي
بطيح من عيون كل الحمام .. ولو كنت احلاهم في عين نفسي ... حتى إنتي ... رغم حنانك على الحمام .. بتسألين .. إيش وقف هذه الحمامه الغريبة بين حمام الحرم .. يمكن حتى ترفض تأكلني .. تقول حمام الحرم أولى
قلت: والله كلامك صحيح ... ولو إنه من حمامه
قالت : احس من كلامك ان بعض المسلمين يتنكروا لإسلامهم .. ممكن يتشبهوا بالكفار .. بملابسهم .. بكلامهم .. بأفعالهم
هل عندكم هذا الكلام !!!!
علميني ... علميني أنا ما أخرج من الساحه ... ولا أروح اسواق ... ولا اشوف قنوات
بغيت أقول إيوه لكن خفت .. تتشمت بي الحمامه .. خفت أكذب ... خاصة إني في ساحة الحرم .. رحت سكت ... سويت نفسي مشغولة بالنظر للبيت الحرام
قلت لها عشان أخرج بعيد عن الموضوع
صراحه عجبني كلامك .. ايش رايك ترجعي معي لجده .. ولك علي اتكفل بكل شيء .. أكلك وشربك
قالت: اعوذ بالله
قلت: ليش تتعوذي بالله مني .. شايفتني بخيلة ؟؟؟
قالت: الحين .. أنا متوكله على الله في كل شيء .. تبغيني اتوكل عليك !!!
بتعب .. بمرض .. بصير مثلكم
قلت: مين قال هذا الكلام ياحمامه .. بتأكلي أجمل أكل ... وراح أأكلك بيديني ... وأحطك في قفص من ذهب
قالت: لو رحت معاك .. بانشغل بك .. متى تيجين .. متى تأكليني .. متى تشربيني .. متى تخليني اشوف الشمس
هذا مكاني .. هنا اذكر الله واسبح .. كيف أعرض عنه لجل هدف ثاني .. كيف ؟؟؟
( ومن أعرض عن ذكري فإن له معيشة ضنكا )
آسفه .. شوفي لك حمامه ثانية .. حمامه تشتهي الذهب .. تقضي عمرها تحلم وتحلم .. لكن ... لا تنسى تقص لها ريشها .. طالما هي سجينة .. ولو كانت في قفص من ذهب .. ولو كانت سجينة أحلامها ... بيبقى الناس يقولون .. ما أجمل القفص .. مسكينة الحمامه .. خلوها تطير
الحين انتي من الصبح تسأليني .. ودي أسألك سؤال واحد
قلت: اسألي .. وأيش تبغين تعرفين .. عنواني .. والا أحلامي
قالت: لا .. باسألك عن دمعة في عيونك
قلت: غريبة .. كنت أظنها خافية على الناس
قالت: اضحك الله سنك يا اميرة .. وهل أنا .. ناس .. أنا حمامه
قلت: تعبت والله يا رمادية الريش .. العمر يجري .. والرحلة طويلة .. والزاد قليل .. والأماني عظيمه ...
.. والقبر يخوف ... والحساب شديد .. والجنة غاليه .. والنار تقول هل من مزيد .. والرب فعال لما يريد ... وكل ما أقول أديت إللي علي .. اكتشف إني لسه بعيييييد .. والفتن .. كل يوم تزيد
ما بين خوفي على نفسي وخوفي على الناس .. لابد من دمعة هنا ... ودمعة هناك .. دمعة على نفسي .. ودمعة عليهم
قالت : اسمعي ... كل يوم أشوف حمام يجي .. وحمام يروح .. وحمام يموت .. لين صارت عندنا قناعة .. هي قناعة عند كل الحمام
قلت: قولي ياحمامه
قالت: شوفي يا حزينة القلب .. نحن بني الحمام الرمادي .. أعزنا الله بجواره فلا نبيع جواره أبدا .. ولو تحطيني في قفص ذهب .. وأنتم بني الإسلام .. لو ابتغيتم العزة بغير دينكم ... ليذلكم الله لكل خلقه .. ثم لا تجدوا من دونه وليا ولا نصيرا
سلميلي على أمة محمد
بلغيهم إن حمام الحرم مشتاق لهم
الحرم مشتاق لهم
الكعبة مشتاقة لهم
خليهم يتوجهوا لها .. ولو .. بقلوبهم وقت الصلاة
بلغيهم إن ربهم غفور رحيم .. مشتاق لتوبة العصاة منهم
ما بين واسع رحمته .. وعظيم عزته .. فليستغفروا
اسأليهم
أما آن للبعض منهم أن يعود ... أما آن بعد
ألم يعلموا أنه ليس لهم إلا الله
علميهم إن كل شئ في الدنيا يحن لذكر الله .. حتى الحجر
مالهم غيره في الدنيا والآخرة
علميهم إننا مثل بعض الدعاة
بعضنا عليهم ينوح
ثم اقرئي عليهم
( ألم يأن للذين أمنوا أن تخشع قلوبهم لذكر الله )
( ألم يأن للذين أمنوا أن تخشع قلوبهم لذكر الله )
( ألم يأن للذين أمنوا أن تخشع قلوبهم لذكر الله )
اشوفك على خير .. الآن يرفعوا الآذان
ينادوا حي على الصلاة
حي الفلاح
وأحب ارفرف وقتها حول المآذن
***
أرق تـح ـيـاتي لكــم أختكـم((أميـرة الـع ـشـاق))
||؛؛فلسفـة حمــامــة؛؛||
العرض المتطور
