]ياراسي اللي مسهره كم موضوع
الناس ناموا .. وأنت لازلت قاعد
أصعب عليك النوم من حبة الكوع
وجفون عينك، عن بعضها تباعد
راحتك ليله والتعب طول الإسبوع
متى عن هموم الليالي تقاعد
في كل ليله وأنت جايٍ بـ مشروع
وأشغلتني ..مابين نازل وصاعد
أيامنا .... ماهيب دايم لنا طوع
ولاتوخذ الدنيا بشد السـواعد
ذكر الحيا متبوع والزين متبوع
مير البلا إن ظـروفنا .. ماتساعد
نبني أمانينا على أفـراد وجمـوع
ومايثبت .. المبـنـى بليّا قـواعـد
علّقت هقواتك على جذوع وفروع
ولاشفت لك بارق ولا أوحيت راعد
والفزعه اللي مالها سيوف ودروع
تخلف لها هقوه وتخلف مواعد
وإن شـانت الأيام ماشـانت طبوع
رجلٍ إلى حان اللـقـى ماتراعد
لكن ياراسي ترى النوم ممنوع
لين الهمـوم .. القاربـات إتّـبـاعد
فكّر عسى بالفكر تلقى لك نفوع
وأوقف أليا شفت إزدحام المقاعد
لو القلم عن عاقل الناس مرفوع
إنباعت جلود الآوادم .. جـواعد
قصيده ياراسي اللي مسهره كم موضوع
العرض العادي
